KNAPK-p siulittaasua Nikkulaat Jeremiassen arfininngormat 19. februar 2022-mi 61-inik ukioqalerluni inuuissiortoq pilluaqquarput.
Nikkulaat Niaqornaarsummi inunngorpoq KNAPK-milu siulittaasutut qinigaagami 4. oktober 2021-mi Nuummut nulluni. Piniartuuvoq aalisartuullunilu.
Nikkulaat 2000-miit 2009-p tungaanut Kangaatsiap Kommuniani kommunalbestyrelsimut ilaasortaavoq, aammalu 2005-miit 2009-mut Inatsisartunut siullerpaamik qinigaalluni. Aappassaanik Inatsisartunut qinigaavoq 2013-miit 2019-ip tungaanut. Nikkulaat aamma Kommune Qeqertalimmi kommunalbestyrelsimut ilaasortanngorpoq 2017-mi, tassanilu 2021-p tungaanut ilaasortaalluni.
Nikkulaat 2016-miit 2019-imut Aalisarnermut, Piniarnermut Nunalerinermullu Naalakkersuisutut toqqarneqarpoq.
Nikkulaap Kristiane nuliaraa sisamanillu meeraqarluni. Nikkulaat Nersornaammik saqqarmiulerneqarpoq 2. november 2006-mi.