Inuit Issittormiut Kattuffiata 14-inissaanik ataatsimeersuarnerani 22. juli 2022-mi isummer- suutit:
Siullermik suliat ingerlaartut iliuutsillu tamaasa ataqqilluinnarakkit oqaatigeqqaarlara, minne- runngitsumik ataatsimeersuarnermi nalunaarutitut saqqummiussaq.
Nalunngilluinnarpara nunarsuarmioqataanitsinni unammilligassavut qanoq annertulluinnarti- gisut, kulturitsigut inuusaatsitsigullu annertoorujussuarmik tatineqarsimalluta oqaruma as- sortorneqarsinnaagunanngilanga.
Pissutigalugu: Nunarput nunanit allamiunit akuliuffigineqarluni ingerlatsiviusimappat ukiut 350-it matuma siorna uani issiavinni issiallunga allassimanavianngikkaluarama, pissutigalugu massakkut piniakkanik killilersuineq eqqarsaatigalugu nunap inuii aqqinngilluinnarlugit uppe- rinngilluinnarlugillu piniakkanik killilersuisoqarmat maani nunatsinni.
Assersuutigilara: Qanittukkut Tasilaap eqqaani pisoq, qilalukkanik qaqortanik nunatta kangi- ani uumasoqanngimmat pisassiisoqarnikuunngilaq, naak tamaani nunaqartut nunaminnik ili- saarinnittut nunaminnillu qimatsinngisaannartut oqartuartaraluartut qilalugarpassuaqartoq, upperineqartut tassaapput tikeraat sumiiffimmut ilisimasaqanngilluinnartut.
Taassumallu kingunerivaa pisanik arsaarneqarneq maminarluinnartoq, sinerissuarput tamar- mi immamik avatangerneqarsimasoq inuiannguit ikittuararsuulluta siammasissumillu naju- gaqarluta siammarsimalluta najugaqarpugut, tassaavorlu siulitta ataqqinartut inuussutissa- qaannarusullutik isumatuumik aaqqissorsimasaat imminnut akornusersuunnatik nunap im- mallu tunniussinnaasaanik nungusaataanngitsumik inuussutissaqarusunneq.
Inatsisit nalunaarutillu atuutsinneqartut maani nunatsinni piniarneq eqqarsaatigalugu ilaa- tigut silaannaap kissatsikkiartorneranut naleqqussarneqanngitsut aamma eqqaasariaqar- soraakka, tassami sikusartumi, ukiortartumi kaperlattartumillu nunaqarpugut, silaannaap immallu kissakkiartornera arlalitsigut sunniuteqarpoq naleqqussarfiginngikkutsigu nukillaa- rutaasussaq, naleqqussarfigigutsiguli aamma iluaqutigineqartussaq.
Taamanersuarli inuuniarnermi inuussutissarsiornermilu atorneqartut isorliunerusuni allan- ngornikuunngillat, qimusseq qajarlu suli atorneqarput atorneqartuartussaallutillu. Taamaak- kaluartoq piniakkat killilersukkat pingaaruteqarluinnartut eqqarsaatigalugit pisassaarutsinne- qartarnerat akuersaarneqarsinnaanngilluinnarpoq, tassaammata akiligassanut inuussutissa- nullu pinngitsoorsinnaanngisatsinnut atorsinnaasatuavut, minnerunngitsumillu meeqqat atu- garissaarnissaannut toqqammaviliisuusartut.
Taamaattumik naggueqatigiit nunat inuuffigisavut sutigut tamatigut eqqartorneqassappata nunap inuii peqataatilluinnarlugit aaqqissuussisoqartariaqarpoq, taakkua tassaammata ki- nguaariit nikerarneranni kinguttakkanit immersorneqartut, ullormiillu ullormut nunaminnik najuisut, inuussutissaqaannarusullutillu pinngortitamik uumasuinillu illersuisut. Taamaat- tumik oqaasiinnaanngitsumik uumasorsiuut piniartullu ilisimasaat oqaasiinnaanngitsumik naligiimmik pisassiisussaatilluni atorneqartariaqarput.
Imminut toquttarneq pillugu akiuiniarneq annikigisassaanngitsumik inuttussuseq saniller- suutissagaanni inissisimavoq, ila uggornarluinnartassusia inuusuttunnguit nunatta siunissai nunatsinnik aqutsisussat inuunerminnik ingerlatseqqissinnaajunnaarlutik aqqut taanna qine- raangassuk. Isumaqarpunga sullissisuniit inatsisiliortuniillu isiginagu inuilli akornannut pigaanni iluaqutaasussat tappiffigineqarnerusinnaagaluartut, tassami ilaatigut inatsimmi ima allassimasoqarmat: (sakkortuumik ulorianartumillu iliuuseqanngippat ikiorsinnaanngilarput) tassani takuneqarsinnaavoq kingusiinnaq qisuariartoqartartoq, ila angajoqqaarpassuimmita qassi kiserliungaarlutik ikiornissaqarnatik inuuneq ingerlappaat?
Nunatsinni oqaatsivut qallunaat (danskit) oqaasiinit nutseriinnarneqarujussuaq aallaaviulluni oqaatsitsinnik sequtserivoq, kalaallisuunngortinneqarnatik nutsiinnarneqartaramik, taamaa- sillunilu ilaatigut oqaatiginiarneqartut uniorujussuarlugit anngunneqartalerlutik. Tamannaa- vorlu piaartumik iliuuseqarfigisassarput, iliuuseqanngikkutta kingusinaalerpugut.
Nerisaqarneq
Immami minguinnarpaalersumi kiisalu nunami saligaannerpaasussaagaluami najugaqarpu- gut, taamaattumik immatta nunattalu tunniussinnaasaannik inuussutissaqarnissarput tama- viaaruttariaqalerparput. Ilisimatuujunngikkaluarlunga isumaqartarama nappaatit nerisassa- nillu sapigaqalersarnerit ilaatigut inuussutissanit nunatta avataaniit eqqussukkanit aallaa- veqartut, taamaattumik imminut pilersorneq oqaasiinnaatinnagu tamaviaarulluguli atuutsik- kutsigu naggueqatigiit nukittuut peqqissullu pilerseqqinnissaannut aqqutissat pingaarnerit ilagissagaat qularutissaanngimmat.
Naggataatigut erseqqissaatigissavara nunarsuarmioqataasutut inuttut pisinnaatitaaffitta Naalagaaffiit Peqatigiit isumaqatigiissutaasigut naqissuserneqartut alorluarneqarnissaat KNAPK-miit pingaartilluinnaratsigu, aammalu tamatumuunakkut anguniagaqarnermi ilunger- sorluta suleqataassagatta. Taamaammat ICC-ip tamatumuunakkut ilungersuuteqarnera tamakkiisumik tapersersorparput.
Ataatsimeersuarnermi angusaqarluarnissassinnik kissaappassi.
Nikkulaat Jeremiassen Siulittaasoq