Naalakkersuisut qaleralinniarnermi qaammatini pingasukkaartuni qaleralittassiisalernerat aalisarnermi kattuffiit soqutigisaqartullu qulaatiinnarlugit pivoq. Aamma Aalisarnermut Piniarnermullu Naalakkersuisup Aqqaluaq B. Egedep aalisarnermi suli amerlanerusunik allannguutinik takkuttoqassanersoq neriorsuutigisinnaanngilaa.
Sinerissap qanittuani qaleralinniarnermi ukiumoortumik pisassiisarneq eqqunneqarnikuuvoq
aalisartut patajaatsunik sinaakkuteqarnissaat qulakkeerniarlugu, taamaasillutik tatigisinnaaminnik atugassaqartinneqarniassammata.
Taamak sunniuteqartigisumik sinerissap qanittuani qaleralinniarnermi pisasseeriaatsimik
allannguuteqartitsisoqarnerani kattuffiit susassaqartullu akulerutsinneqarsimannginnerat,
Naalakkersuisut ammasumik akuutitsisumillu ingerlatsinissamik neriorsuuteqarneranut naapertuutinngilaq.
Aalisarnermi politikki allanngorartumik ingerlanneqaleraleraangat qularneq nalorninerlu pilertarpoq, aalisartut akornanniinnaanngitsoq, kisianni aamma kattuffiit akornanni. KNAPK–p taamatut periuseqarneq sakkortuumik akerlilerpaa, tassami Naalakkersuisut imaaliallaannarlutik oqaloqatiginneqqaaratik aalajangiigaangat, tamanna sinerissap qanittuani aalisarnermut
annertuumik eqquinerlussinnaavoq.
Naalakkersuisunut aamma tatiginnilersitsinerunngilaq sinerissap qanittuani sinaakkutit taamak annertutigisumik allanngortinneqarmata, Naalakkersuisut Aalisarneq pillugu Ataatsimiititaliarsuup isumaliutissiissutaa pillugu isumasioqatigiisitsiniarlutik aggersaariarlutik, tassanimi eqqartugassat ilagaat aalisarnermut inatsisissaq nutaaq.
KNAPK–miit kissaatigineqarpoq aalisarnermi susassaqartut sapinngisamik tamarmik akuutil–
lugit oqaloqatigalugit ingerlatsisoqarnissaa, taamaasilluni kattuffiit imaluunniit siunnersuisoqatigiit ataasiakkaat immikkut pinnagit. Periarneq pitsaanersoq nalilersorneqarsinnaavoq, kisianni allannguutit taamak annertutigisut pilertinnagit sinaakkutit sunniutaasullu sukumiisumik oqaluuserineqaqqaartariaqarput.
’Sinerissap qanittuani aalisarnermi killiffimmi ataasiinnaq aallaavigalugu nalilersuisoqarsinnaanngilaq, taamaattumik Naalakkersuisut kattuffiit susassaqartut tamaasa akuutillugit oqaloqatigisariaqarpai, ingammik aalajangiinerit sunniutaat pillugit peqqissaartumik nalilersuinissaq pisariaqarmat’ oqarpoq KNAPK–p siulittaasua Nikkulaat Jeremiassen.
’Ammasumik aqutsinissaq akuutitsinissarlu qineqqusaarutigisimagaanni, taava Naalakkersuisut pipallatamik iliuuseqartarnerat siunertanut naapertuutinngilluinnarpoq. Sinerissap qanittuani aalisarneq pimoorullugu sulisoqartariaqarpoq, inuussutissarsiummi tassani nunatsinni
innuttaasut affangajaat pineqarmat’ Nikkulaat Jeremiassen naggasiivoq.
Aalisartut Piniartullu pillugit Nunarput inuussutissaqaqqullugu
Naalakkersuisut Aalisarneq pillugu Ataatsimiititaliarsuup sulinera isumaliutissiissutaalu pillugit marsip 2–ani 3–anilu isumasioqatigiisitsinissaani, ingammik aalisarneq pillugu inatsisip
nutarterneqarnissaa sammmisassat pingaarnerit ilagimmassuk, KNAPK isumaliutersuutinik isummaminillu saqqummiissaaq.
Taamaattoq sinerissap qanittuani aalisarnermi atugassarititaasut sinaakkutillu samminissaat immikkut soqutiginarluinnarpoq, tassami akit, pisassat akuersissutillu ilaatigut sammineqartussaammata. Tamakkununnga KNAPK iliuuserineqarsinnaasut pillugit akuussaaq.